హెల్త్ ఇన్సూరెన్స్ రంగంలో నిబంధనల అమలుపై ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా (ఐఆర్‌డీఏఐ) కఠినంగా వ్యవహరించింది. పాలసీదారుల హక్కులను పట్టించుకోకుండా వ్యవహరించిందన్న కారణంతో కేర్ హెల్త్ ఇన్సూరెన్స్ సంస్థపై రూ.కోటి జరిమానా విధించింది.

క్లెయిమ్‌లను సెటిల్ చేసే విధానంలో స్పష్టత లేకపోవడం, పాలసీదారులకు అవసరమైన సమాచారం ఇవ్వకపోవడం, అలాగే సంస్థలో కార్పొరేట్ గవర్నెన్స్ లోపాలు ఉన్నాయని ఐఆర్‌డీఏఐ తన పరిశీలనలో గుర్తించింది.

ఫిర్యాదుల పరిష్కారంలో నిర్లక్ష్యం

రెగ్యులేటర్ పరిశీలనలో పలు కీలక లోపాలు బయటపడ్డాయి.
పాలసీదారులు చేసిన ఫిర్యాదులను నిర్ణీత గడువులో పరిష్కరించడంలో సంస్థ విఫలమైందని పేర్కొంది. అంతేకాకుండా, సైబర్ భద్రతకు సంబంధించిన లోపాలు, రీఇన్సూరెన్స్ ఖాతాల నిర్వహణలో తప్పిదాలు కూడా ఉన్నట్లు గుర్తించింది.

మరొక కీలక అంశంగా, పాలసీ కోసం చెల్లించిన కొన్ని డిపాజిట్లు సరిగా గుర్తించకుండా, వాటి నిర్వహణలో నిర్లక్ష్యం చేసినట్లు ఐఆర్‌డీఏఐ స్పష్టం చేసింది.

క్యాష్‌లెస్ క్లెయిమ్‌లలో భారీ లోపాలు

ముఖ్యంగా క్యాష్‌లెస్ క్లెయిమ్‌ల విషయంలో పరిస్థితి మరింత ఆందోళనకరంగా ఉందని రెగ్యులేటర్ తెలిపింది.
పరిశీలించిన కేసుల్లో దాదాపు 69 శాతం క్యాష్‌లెస్ క్లెయిమ్‌లకు అవసరమైన తప్పనిసరి డాక్యుమెంట్లు లేవని ఐఆర్‌డీఏఐ గుర్తించింది.

అలాగే, పాలసీదారులకు వర్తించే డిస్కౌంట్ల వివరాలను ముందుగా తెలియజేయకపోవడం, ఆసుపత్రులు సమర్పించిన బిల్లులు – క్లెయిమ్ సెటిల్‌మెంట్ మొత్తాల మధ్య స్పష్టమైన తేడాలు ఉండటంపై తీవ్ర అసంతృప్తి వ్యక్తం చేసింది.

పాలసీదారుల రక్షణే లక్ష్యం

ఈ వ్యవహారంపై స్పందించిన ఐఆర్‌డీఏఐ, ఇన్సూరెన్స్ కంపెనీలు పాలసీదారుల ప్రయోజనాలను ప్రధానంగా పరిగణనలోకి తీసుకోవాలని స్పష్టం చేసింది. క్లెయిమ్ ప్రక్రియలో పారదర్శకత, సమాచారం స్పష్టంగా అందించడం, నిబంధనల పాటన తప్పనిసరి అని హెచ్చరించింది.

ఇలాంటి లోపాలు పునరావృతమైతే మరింత కఠిన చర్యలు తీసుకుంటామని కూడా రెగ్యులేటర్ సూచించింది. ఈ ఘటనతో హెల్త్ ఇన్సూరెన్స్ పాలసీదారులు తమ హక్కులపై మరింత అప్రమత్తంగా ఉండాల్సిన అవసరం ఉందని నిపుణులు అభిప్రాయపడుతున్నారు.