తెలంగాణ రాష్ట్రం భారీ పెట్టుబడులను ఆకర్షిస్తూ, దేశవ్యాప్తంగా దృష్టిని ఆకర్షిస్తోంది. 2023 డిసెంబర్ నుంచి ఇప్పటి వరకు రాష్ట్రానికి సుమారు రూ.3 లక్షల కోట్ల విలువైన పెట్టుబడులు వచ్చాయని, ముఖ్యమంత్రి రేవంత్ రెడ్డి వెల్లడించారు. ఈ పెట్టుబడుల ఫలితంగా లక్షకుపైగా ఉద్యోగాలు ఏర్పడ్డాయని తెలిపారు. వాటిలో భాగంగా, హైదరాబాద్‌ నానక్‌రాంగూడలోని వంశీరాం సువర్ణదుర్గ టెక్ పార్క్‌లో సొనాటా సాఫ్ట్‌వేర్‌ కంపెనీ తన కొత్త కార్యాలయాన్ని ప్రారంభించింది. సుమారు 2 లక్షల చదరపు అడుగుల విస్తీర్ణంలో ఏర్పాటైన ఈ కార్యాలయంలో ఏఐ (ఆర్టిఫిషియల్ ఇంటెలిజెన్స్) ఆధారిత పనులను ముందుకు తీసుకెళ్లనున్నారు. ముఖ్యమంత్రి రేవంత్‌ రెడ్డి సోమవారం దీనిని ప్రారంభించారు.

సొనాటా సాఫ్ట్‌వేర్‌ సీఈవో సమీర్ ధిర్ మాట్లాడుతూ – కొత్తగా ప్రారంభించిన కార్యాలయం ద్వారా దాదాపు 5 వేల మందికి ఉద్యోగ అవకాశాలు కల్పించనున్నట్లు తెలిపారు. ఇది పూర్తిగా ఏఐ ప్రాజెక్టులకే కేంద్రీకృతమైన కార్యాలయం అవుతుందని పేర్కొన్నారు.

హైదరాబాద్‌ నగరం ఇప్పటికే గ్లోబల్ కేపబిలిటీ సెంటర్లు (GCC), లైఫ్ సైన్స్, డేటా సెంటర్లు, తయారీ రంగాల్లో విపరీతమైన అభివృద్ధిని సాధించిందని సీఎం అన్నారు. మైక్రోసాఫ్ట్, ఇన్ఫోసిస్, విప్రో, హెచ్‌సీఎల్ టెక్, కాగ్నిజెంట్ వంటి అగ్రగామి ఐటీ కంపెనీలు తమ కార్యాలయ విస్తరణకు హైదరాబాద్‌ను ఎంచుకోవడం గర్వకారణమన్నారు.ప్రజా సంక్షేమంతోపాటు, పరిశ్రమల అభివృద్ధి ద్వారానే రాష్ట్ర ఆర్థిక వ్యవస్థ బలోపేతం అవుతుందని సీఎం స్పష్టం చేశారు. రైతులు, యువత, మహిళలు, విద్యార్థులు, సీనియర్‌ సిటిజన్లతో పాటు పరిశ్రమలకు ప్రభుత్వ మద్దతు అందిస్తోందన్నారు.

రాష్ట్రంలో భవిష్యత్తు అవసరాలను దృష్టిలో ఉంచుకుని, ఫ్యూచర్ సిటీలో 'ఏఐ నగరం', 'యంగ్ ఇండియా స్కిల్స్ యూనివర్సిటీ', 'ఇంటిగ్రేటెడ్ రెసిడెన్షియల్ స్కూల్స్', 'స్పోర్ట్స్ యూనివర్సిటీలు' ఏర్పాటు చేస్తున్నామని సీఎం వెల్లడించారు. మైక్రోసాఫ్ట్‌ వంటి కంపెనీలు ఇందులో భాగస్వామ్యం కావాలనే ఆసక్తిని చూపుతున్నాయని తెలిపారు.జూన్ లేదా జూలైలో ‘ఏఐ యూనివర్సిటీ’ ప్రారంభం కానుందని, రాబోయే కాలంలో ప్రపంచ స్థాయి నిపుణులను తయారు చేయాలన్నదే లక్ష్యమని ఐటీ మంత్రి శ్రీధర్ బాబు పేర్కొన్నారు. అదే విధంగా, పౌరసేవలను ఏఐతో అనుసంధానించి ప్రజలకు మరింత సులభతరం చేయడానికి ప్రభుత్వం కృషి చేస్తోందన్నారు.

ప్రపంచంలోనే పెద్ద ఈవెంట్లలో ఒకటైన మిస్ వరల్డ్ పోటీలు హైదరాబాద్‌లో జరగడం రాష్ట్రానికి గర్వకారణమని సీఎం చెప్పారు. రాబోయే రోజుల్లో మరిన్ని అంతర్జాతీయ కార్యక్రమాలను రాష్ట్రంలో నిర్వహించేలా ప్రణాళికలు రచిస్తున్నామని తెలిపారు. తెలంగాణను ట్రిలియన్ డాలర్‌ ఆర్థిక వ్యవస్థగా అభివృద్ధి చేయాలన్నది ప్రభుత్వ దృష్టి అని చెప్పారు.

రాష్ట్ర గవర్నర్ జిష్ణుదేవ్ వర్మతో సీఎం రేవంత్ రెడ్డి సోమవారం ఉదయం భేటీ అయ్యారు. దేశంలో మరియు సరిహద్దుల్లో నెలకొన్న పరిస్థితులపై చర్చ జరిగిందని సమాచారం. రాష్ట్ర శాంతిభద్రతలపై ముఖ్యమంత్రి గవర్నర్‌కు వివరాలు ఇచ్చారు. ఈ సమావేశంలో మంత్రులు, ఇతర ఉన్నతాధికారులు పాల్గొన్నారు.

అలాగే, ఫలక్‌నుమా ప్యాలెస్‌లో మిస్ వరల్డ్ పోటీదారులకు ఏర్పాటు చేసిన ప్రత్యేక విందులో పాల్గొనాలంటూ గవర్నర్‌కు సీఎం ఆహ్వానం పలికారు. రాష్ట్ర అవతరణ వేడుకలకు కూడా హాజరుకావాలని కోరారు.