Breaking News

ప్రభుత్వ ఏర్పాటులో టీవీకే అనుభవలేమి బయటపడిందా?

ప్రభుత్వ ఏర్పాటుకు అవసరమైన మద్దతు కూడగట్టడంలో టీవీకే అనుభవరాహిత్యం బయటపడిందనే చర్చ తమిళ రాజకీయాల్లో సాగుతోంది.


Published on: 09 May 2026 15:46  IST

తమిళనాడులో సంచలన ఫలితాలు సాధించిన Vijay నేతృత్వంలోని టీవీకే పార్టీ ప్రభుత్వం ఏర్పాటుకు అవసరమైన మద్దతు కూడగట్టడంలో ఇబ్బందులు ఎదుర్కొంటోంది. తొలి అసెంబ్లీ ఎన్నికల్లోనే అతిపెద్ద పార్టీగా నిలిచినా, పూర్తి మెజారిటీకి కావాల్సిన ఆరు సీట్ల మద్దతు కోసం నాలుగు రోజులుగా ప్రయత్నాలు కొనసాగుతుండటం రాజకీయ వర్గాల్లో చర్చకు దారితీసింది.

రాజకీయ అనుభవలేమి కారణంగానే ఈ పరిస్థితి వచ్చిందని విశ్లేషకులు అభిప్రాయపడుతున్నారు. ఎన్నికల ఫలితాలు వెలువడిన వెంటనే ఇతర పార్టీల నేతలను నేరుగా కలవాల్సింది పోయి, టీవీకే వాట్సాప్ ద్వారా కామన్ లెటర్ పంపించడం వివాదానికి దారితీసింది. దీంతో తమను టీవీకే తక్కువగా చూసిందనే భావన ఇతర పార్టీల్లో ఏర్పడినట్లు తెలుస్తోంది.

పరిస్థితి క్లిష్టంగా మారిన తర్వాతే టీవీకే నేతలు సీపీఐ, సీపీఎం, వీసీకే, ఐయూఎంఎల్ వంటి పార్టీలను నేరుగా కలిసి మద్దతు కోరినట్లు సమాచారం. ఈ క్రమంలో కాంగ్రెస్ అధ్యక్షుడు Mallikarjun Kharge స్వయంగా రంగంలోకి దిగినట్లు రాజకీయ వర్గాలు చెబుతున్నాయి. ఆయన జోక్యం తర్వాతే కొన్ని పార్టీలు మద్దతుపై సానుకూలంగా స్పందించినట్లు సమాచారం.

గవర్నర్ వ్యవహారంలో కూడా టీవీకే తీరుపై విమర్శలు వచ్చాయి. సాధారణంగా శాసనసభాపక్ష నేత ఎన్నికైన తర్వాత గవర్నర్‌ను నేరుగా కలిసి ఎమ్మెల్యేల జాబితా అందజేయడం ఆనవాయితీ. కానీ టీవీకే మాత్రం ఈ-మెయిల్ ద్వారా సమాచారం పంపించడంతో గవర్నర్ కార్యాలయం కూడా అదే విధంగా స్పందించినట్లు తెలుస్తోంది.

టీవీకేలో రాజకీయ అనుభవం ఉన్న నాయకులు చాలా తక్కువగా ఉండటం కూడా ఇప్పుడు ప్రధాన చర్చగా మారింది. అన్నాడీఎంకే నుంచి వచ్చిన కొందరు నేతలను మినహాయిస్తే మిగతా వారంతా కొత్తవారేనని విశ్లేషకులు చెబుతున్నారు. ప్రభుత్వం ఏర్పాటులో రాజకీయ సమీకరణాలు, సంప్రదాయాలు, మద్దతు కూడగట్టే వ్యూహాల్లో అనుభవలేమి స్పష్టంగా కనిపించిందనే అభిప్రాయాలు వ్యక్తమవుతున్నాయి.

Follow us on , &

ఇవీ చదవండి

ట్రెండింగ్ వార్తలు మరిన్ని

Advertisement