అమెరికాలోని కాలిఫోర్నియా రాష్ట్రం శాన్ డియాగోలో ఉన్న ఒక మసీదుపై ఇద్దరు టీనేజర్లు జరిపిన కాల్పుల్లో ముగ్గురు వ్యక్తులు అక్కడికక్కడే మరణించారు. ఈ ఘటన సోమవారం (మే 18, 2026) మధ్యాహ్నం వేళలో చోటుచేసుకుంది. కాల్పులు జరిపిన ఇద్దరు దుండగులు (17, 19 ఏళ్ల యువకులు) కూడా ఆ తర్వాత తమను తాము కాల్చుకుని ఆత్మహత్య చేసుకోవడంతో, ఈ ఘోర కలికటంలో మొత్తం ఐదుగురు ప్రాణాలు కోల్పోయారు.శాన్ డియాగో నగరంలోని అత్యంత ప్రసిద్ధ, పెద్ద మసీదు అయిన 'ఇస్లామిక్ సెంటర్ ఆఫ్ శాన్ డియాగో' (ICSD) ప్రాంగణంలో ఈ దారుణం జరిగింది.

దుండగుల చొరబాటు: సైనిక దుస్తులు (Camouflage) ధరించిన ఇద్దరు టీనేజ్ యువకులు, ఆయుధాలతో మసీదు ప్రాంగణంలోకి చొరబడి విచక్షణారహితంగా కాల్పులు జరిపారు.

సెక్యూరిటీ గార్డు సాహసం: మసీదు సెక్యూరిటీ గార్డు అమీన్ అబ్దుల్లా ప్రాణాలకు తెగించి దుండగులను లోపలికి వెళ్లకుండా అడ్డుకున్నారు. దుండగుల బుల్లెట్ల ధాటికి ఆయన అక్కడికక్కడే మరణించారు. ఆయన చూపిన ధైర్యం వల్లే మసీదు లోపల ఉన్న వందలాది మంది ప్రాణాలు దక్కాయని పోలీసులు తెలిపారు.

మృతుల వివరాలు: ఈ దాడిలో సెక్యూరిటీ గార్డుతో పాటు మసీదు సిబ్బంది/సభ్యులైన మరో ఇద్దరు పురుషులు (నాదర్ అవద్, మన్సూర్ కజీహా) చనిపోయారు.

పిల్లలు సురక్షితం: కాల్పులు జరిగిన సమయంలో మసీదు ఆవరణలోని స్కూల్లో సుమారు 200 మంది చిన్నపిల్లలు, ఉపాధ్యాయులు ఉన్నారు. సెక్యూరిటీ గార్డు అప్రమత్తం చేయడంతో వారంతా తలుపులు వేసుకుని సురక్షితంగా బయటపడ్డారు.

నిందితుల ఆత్మహత్య: కాల్పుల అనంతరం నిందితులిద్దరూ మసీదుకు కొద్ది దూరంలో నిలిపి ఉంచిన తమ వాహనంలోనే తుపాకీతో కాల్చుకుని ఆత్మహత్య చేసుకున్నారు.

దాడికి కొన్ని గంటల ముందే ఒక నిందితుడి తల్లి.. తన కొడుకు ఇంట్లోని ఆయుధాలు, కారు తీసుకుని పారిపోయాడని పోలీసులకు ఫిర్యాదు చేసింది. కానీ పోలీసులు స్పందించే లోపే ఈ ఘోరం జరిగిపోయింది.నిందితుల వద్ద 30కి పైగా తుపాకులు, ఒక క్రాస్‌బో లభించాయి. వారు వాడిన ఆయుధాలపై ముస్లింలకు వ్యతిరేకంగా విద్వేషపూరిత వ్యాఖ్యలు రాసి ఉన్నాయి.ఈ దాడిని అమెరికా నిఘా సంస్థలు, పోలీసులు ఒక 'హేట్ క్రైమ్' (మతపరమైన విద్వేష పూరిత దాడి) కోణంలో దర్యాప్తు చేస్తున్నారు.

ఈ ఘటనను అమెరికా వ్యాప్తంగా ఉన్న ముస్లిం సంఘాలు మరియు పలువురు రాజకీయ నాయకులు తీవ్రంగా ఖండించారు.